Rev 3 | MPX | STEP | Yaka gamagal o i baem al eliyau i ba, “Leta u leleli ni nok ni na panuwa Sadis, ni na anelose elana toto toekelesiya ali tomatahikan, ge nu ba nu ola hiwe: Gamagal toto putum ali gewi seben i pihikagil ge Yehoba Yayaluwana i minaa eliyana, Yayaluwana o i ola yayaluwa seben, wana baaba i ola hiwe. Wami pagan iyaka ya atena. Wasamiu i ola hiwe, tage komiu ekelesiya yawalina gaganina, yaa ya atena yayaluwamiu iyaka i aliga.

a 3:1 Pan 1:4,16

b 3:3 Mat 24:43-44; Pan 2:5; 16:15; 1Tes 5:2

c 3:4 Yuda 23

e 3:5 Tota 32:32-33; Mat 10:32; Luke 10:2; 12:8

f 3:7Ais 22:22

g 3:8 1Kol 16:9

h 3:9 Pan 2:9; Ais 45:14; 49:23; 60:14

i 3:10 Luke 21:19; 2Tim 2:12

j 3:12Ais 62:2; 65:15; Pan 14:1; 21:2

l 3:15 Loma 12:11

m 3:17 1Kol 4:8; Luke 12:21

n 3:18Ais 55:1; Pan 4:4

o 3:19 1Kol 11:32; Hib 12:6; Pan 2:5

p 3:20 Diyo 14:23

Revelation of John 3

Toekelesiya Sadis wali Wasa

1 Yaka gamagal o i baem al eliyau i ba, “Leta u leleli ni nok ni na panuwa Sadis, ni na anelose elana toto toekelesiya ali tomatahikan, ge nu ba nu ola hiwe:

Gamagal toto putum ali gewi seben i pihikagil ge Yehoba Yayaluwana i minaa eliyana, Yayaluwana o i ola yayaluwa seben, wana baaba i ola hiwe. Wami pagan iyaka ya atena. Wasamiu i ola hiwe, tage komiu ekelesiya yawalina gaganina, yaa ya atena yayaluwamiu iyaka i aliga. ^a 2 Besemiu kenu! Nuku lut ge pagan waiwaisana nuku pagasisi eliyamiu ge bahi ni yayaomal hot, kaiwena iyaka ya pwawamiu wami pagan nige ga i sasapu no Yabowaine matanaa. 3 Panpankiti waiwaisana toto iyaka valila ku hago ge ku ahe nuku nuwahikan. Inoke nuku toulil, ge wami pagan nanakina ana en nuku pek. Ebo nuku mimi kenukenu ya ge nige nuku lulut, he nasi na nowa eliyamiu. Nige nuku aatena hauna sauga ge na nowa, yaa no vin eliyamiu ni ola tokaoma wali vin. ^b 4 Yaa komiu Sadis gamagaliliyau enuna ami kaliko nige ku papabiki, nige ku aapanak-agimiu gegi paganina elana. Wami pagan i sapu, inoke bwaliga kaliko wakewakekena nuku galoi ge alowau komiu ta notoyawa. ^c

5 Bolo hi palahikan kaiweu ge nak hi gasisi luwai, kaliko wakewakekena nihi galoi ni ola al to. ^{▼▼3:5Ana sapu te Yehoba ni awa sapusapu-agil ge nige al wali gegi etega ni gagan.} Alaliya nige na leleke yoho yawal ana buki gamwanaa, yaa Nam alonau ge wana aneloseyau mataliyaa na ba pamasalil na ba, ‘Heliya no gamagalau.’ ^e 6 Ebo tanamiu i gan, inoke hauna gun Yayaluwa Bwabwalena i baunan ekelesiya seben kaiweliya nuku hago.”

Toekelesiya Piladelpiya wali Wasa

7 Yaka i baem al eliyau i ba, “Leta u leleli ni nok ni na panuwa Piladelpiya, ni na anelose elana toto toekelesiya ali tomatahikan, ge nu ba nu ola hiwe:

Gamagal toto i bwabwalena ge i baaba tunahot, wana baaba i ola hiwe. Nau Yelusalema vavaluna ana abauluulutuk ana ki ya logugui-an, i ola te sauga houhouwena kin Deibid gamagalau wali ulutuk Yelusalema elana i logugui-an. Ebo nog na ki pwela, he nige gamagal etega bosowaina ni kaus, ge ebo nog na ki kaus, nige gamagal etega bosowaina ni pwela. ^f 8 Wami pagan iyaka ya atena. Ya atena te bwagana nige ku gagasisi hot, yaa no panpankiti ku toulil bubun ge alau nige ku aalahan. Inoke nog iyaka ya pwela maninimiwa ge nige gamagal etega bosowaina ni kaus. ^g 9 He Yudiya gamagaliliyau bolo hi ba ‘Ama ya te Yehoba wana boda’ yaa hi kakakawi, heliya nige Yehoba wana boda i oola, heliya Seitani wana totapwalolo, abwe na ahel nihi nem eliyamiu ge na ba nihi loepwakoku aemiu gabulanaa, yaka abwe nihi atena age ya nunuwana-agimiu. ^h 10 Valila ya ba nuku palahikan ge no ba pagasisi o iyaka ku toulil, inoke sauga ebo palopalomwan ana sauga ni vin ge tomipanayawi gegewel ni labosel, nau abwe na matahikagimiu. ⁱ 11 Sauga kekeisi na nowa eliyamiu. Panpankiti waiwaisana toto iyaka ku ahe nuku matahikan bubun, inoke bahi gamagal etega wami palahikan molana ni aahe yoho eliyamiu.

12 Bolo hi palahikan kaiweu ge nak hi gasisi luwai, na telel nihi tabwa no Yabowaine wana Limi Bwabwalena ana kokola, inoke sauga gegewena nihi miminaa to Yehoba manininaa. Alan eton na leliya elal: no Yabowaine alana, wana panuwa alana, ge nau alau vavaluna. He no Yabowaine wana panuwa heiya Yelusalema vavaluna toto abwe ni loem labulabumwa iya eliyana. ^j 13 Ebo tanamiu i gan, inoke hauna gun Yayaluwa Bwabwalena i baunan ekelesiya seben kaiweliya nuku hago.”

Toekelesiya Leodisiya wali Wasa

14 Yaka i baem al eliyau i ba, “Leta u leleli ni nok ni na panuwa Leodisiya, ni na anelose elana toto toekelesiya ali tomatahikan, ge nu ba nu ola hiwe:

Gamagal toto alana hi ba ‘Emen,’ ^{▼▼3:14Ta ba “Emen” o ebo ta ba “Ibwe. I ola.” Yeisu iya toba tunahot ge iya Yehoba wana nuwatu kaiwela i patunahot, inoke bosowaina ta ba iya alana “Emen.”} iya Yehoba wana baaba ana towasa sasapona ge tutunahotina, ge iya bugul gegewena Yehoba i ginolil wali abamasal, wana baaba i ola hiwe. 15 Wami pagan iyaka ya atena. Ya atena nige ku tutultul ge nige ku wawaiwai. Nige ku totowaagau, yaa nige tage alona wami yaliyaya ge anau ku hago bubun. Binimala nuku tultul o ebo nuku waiwai. ^l 16 Yaa komiu bwawaiwaimiu ya, nige ku tultul ge nige ku waiwai, inoke na koyapuli yohimiu. 17 Ku ba, ‘Ama ha gogomwau ge wama bugul hi gewi, nige bugul etega ha kakalaan.’ Yaa age nige ku aatena te ku miloloyowan ge gamagalau ateliya i lomwanagimiu. Komiu ku gulagula, matamiu i kai ge ku bokaboka. ^m 18 Inoke na ba pagasisi eliyamiu, gold hot nuku pwamolaa eliyau, toto hi ton haba ginaha elana ge mumusana i mowasi, yaka eliyana abwe nuku gogomwau. Kaliko yayanana nuku pwamolaa eliyau, yaka nuku galoi inoke bobokamiu nuku kaus ge ami puluwawi ni mowasi. I ola al, matan ana sawasawal nuku pwamolaa eliyau, yaka nuku holek matamiwa inoke matamiu ni mwananal. ⁿ

19 Bolo ya nunuwana-agil, ya haveyanagil ge ya pahenapol wali pagan nanakina kaiwena. Inoke pagan waiwaisana nuku logasisi-an ge toto nanakina ana en nuku pek. ^o 20 Ku kite! Nau te ya talmilil nog elana ge ya pitipiti e. Ebo etega anau ni hago ge nog ni pwela eliyau, inoke na ulutuk elana ge alou naha anan toyawa. ^p

21 Bolo hi palahikan kaiweu ge nak hi gasisi luwai, na talamwagil alowau naha tologugui toyawa ge naha minaa no abamisiyo wawasana elana, ni ola nau valila nak ya gasisi luwai ge sauga ya alou Nam ha mitoyawa wana abamisiyo wawasana elana. 22 Ebo tanamiu i gan, inoke hauna gun Yayaluwa Bwabwalena i baunan ekelesiya seben kaiweliya nuku hago.”